കോളേജിൽ റാഗിങ് നിയമവിരുദ്ധമാണെങ്കിലും ചെറിയ രീതിയിൽ ഉള്ള പരിചയപ്പെടൽ സാധാരണയാണല്ലോ....എനിക്കും ഉണ്ടായി ഒരനുഭവം...😊
വർഷം 2006...ഒരുപാട് പ്രതീക്ഷകളോടെ കോളേജിന്റെ പടിവാതിലിൽ കാലെടുത്തു വച്ചു...🚶♂️ക്ലാസ്സിൽ കയറുന്നതിനു മുൻപേ ഒരു സീനിയർ പയ്യൻ വന്നു വിളിച്ചു..."ഇവിടെ വാടാ !!"😠 ഞെഞ്ചിടിപ്പോടെ ഞാൻ അടുത്ത് ചെന്നു...എന്നോട് പേര്, സ്ഥലം, ഡിപ്പാർട്മെന്റ് ഇതൊക്കെ ചോദിച്ചു...എല്ലാത്തിനും വിനീതനായി ഞാൻ മറുപടി പറഞ്ഞു.... വീണ്ടും ഭീഷണിയുടെ സ്വരത്തിൽ "ഇനി നീ ഒരു പാട്ടു പാട്...!!". സ്ഥിരം കുട്ടികൾ പറയുന്ന പോലെ ഞാനും പറഞ്ഞു "എനിക്ക് പാടാനൊന്നും അറിയില്ല സേട്ടാ". "പാടാതെ നീ ഇവിടന്ന് പോകില്ല...പാട്രാ..!! 😡😡
ഭീഷണിയുടെ സ്വരം കടുത്തതോടെ മൂളിപ്പാട്ട് പോലും പാടാത്ത ഞാൻ പാടാൻ തീരുമാനിച്ചു...ആ സമയത്താണ് ക്ലാസ്സ്മേറ്റ്സ് എന്ന സിനിമ ഇറങ്ങുന്നത്...വിനീത് ശ്രീനിവാസൻ പാടിയ "എന്റെ ഖൽബിലെ വെണ്ണിലാവ് നീ" എന്ന ഗാനം കത്തി നിക്കുന്ന സമയം....നമുക്ക് ആറാം തമ്പുരാനിലെ ലാലേട്ടനെ പോലെ സംഗീത ഗുരുക്കൻമ്മാർ ആരും ഇല്ലാത്തത് കൊണ്ട് ഒരു ഉളുപ്പും ഇല്ലാതെ മേല്പറഞ്ഞ ഗാനം വച്ചു കാച്ചി...നാലു വരിയിൽ തന്നെ സീനിയർ ഫ്ലാറ്റ്..."നീ കൊള്ളാം...അടുത്ത കോളേജ് ഫങ്ക്ഷനിൽ നീ ഈ പാട്ടു തന്നെ പാടണം." ഇയാൾക്ക് തലയ്ക്കു സുഖമില്ലേ", 🙄 എന്ന് പിറുപിറുത്തു കൊണ്ട് ഞാൻ എന്റെ ക്ലാസ്സിൽ പോയി ഇരുന്നു.
രണ്ടു ദിവസം കഴിഞ്ഞപ്പോൾ കോളേജ് യൂണിയൻ ഭാരവാഹി ക്ലാസ്സിൽ വന്നു ചോദിച്ചു..."ആരാ അരുൺ...നീ പാടുമല്ലേ...നിന്റെ പേര് കൊടുത്തിട്ടുണ്ട്... മറ്റന്നാൾ സ്റ്റേജിൽ കേറി പാടണം. എല്ലാം വളരെ പെട്ടന്നായിരുന്നു...കോളേജിൽ പാടാൻ അവസരം കിട്ടുക എന്നത് ചില്ലറ കാര്യമല്ല...പക്ഷേ "എന്റെ ഖൽബിലെ" എന്ന ഗാനം പാടാൻ കഴിഞ്ഞില്ല. അതൊക്കെ കോളേജിലെ ആസ്ഥാന ഗായകർ പാടും...അന്നത്തെ ഹിറ്റ് ഗാനമല്ലേ...🎶🎸
അങ്ങനെ ഏതു പാട്ടു പാടും എന്ന ആലോചനയിൽ ഇരിക്കുമ്പോളാണ് യുഗ്മഗാനം എന്ന ആശയം മനസ്സിൽ വന്നത്...ക്ലാസ്സിൽ പാടുന്ന ഒരു കുട്ടി ഉണ്ടായിരുന്നു.... എന്നെപ്പോലെയല്ല...സംഗീതം അഭ്യസിച്ച കുട്ടി...🎼അവൾ കൂടെ പാടാമെന്ന് സമ്മതിക്കുന്നു....🎤
ഗവണ്മെന്റ് കോളേജിൽ... അതും കോളേജ് യൂണിയൻ പിന്തുണയോടെ പാടുമ്പോൾ അതൊരു വില തന്നെയല്ലേ...അവസരം ചിലപ്പോൾ നമ്മളെ തേടി വരും..അപ്പോൾ കേറി അങ്ങ് മിന്നിച്ചേക്കണം...അതെ..മിന്നിച്ചു.... കീർത്തിചക്ര എന്ന ചിത്രത്തിലെ "പൂഞ്ചോലൈ കിളിയെ" എന്ന കാർത്തിക് പാടിയ ഗാനം....പാടി....🎤🎶 പാട്ടിനൊപ്പം ഞാനും ഹിറ്റ് ആയി... (വീണ്ടും പാടാൻ പറയരുത് 🙏) കൈയടിയുടെ മേളം...👏👏. കോളേജ് മുഴുവൻ "അരുൺ" എന്ന പേര് മുഴങ്ങിക്കേട്ട ദിവസമായിരുന്നു അത്....സത്യത്തിൽ അങ്ങനെയൊക്കെ പാടാൻ പറ്റുമെന്ന് ഞാൻ എന്റെ സ്വപ്നത്തിൽ പോലും കരുതീട്ടില്ല.. തള്ളിയതല്ല കേട്ടോ...നടന്നതാ..🙈
പിന്നീടങ്ങോട്ട് ഫാൻസ് കൂടി...👋അല്പം തലക്കനം ഒക്കെ വന്നു...ഗായകൻ അല്ലേ...👨🎤അതും കോളേജിൽ ഗായകന്മാർക്ക് ഉള്ള സ്വാധീനം ഞാൻ പറയാതെ തന്നെ അറിയാമല്ലോ.... 😜 അങ്ങനെ അടുത്ത പ്രോഗ്രാം വന്നു...കാർത്തിക് പാടിയ പാട്ടു തന്നെ പാടണം എന്ന് നിർബന്ധം.... ഒടുവിൽ ഗാനം തിരഞ്ഞെടുത്തു...ഗജിനി എന്ന സിനിമയിലെ "ഒരു മാലൈ ഇളവെയിൽ നേരം". ഒരു ട്രയൽ പോലും നോക്കീല...ചുമ്മാ പാട്ടൊന്ന് കേട്ടു നോക്കി....മതി..ധാരാളം...സ്റ്റേജിൽ കസറും...അതാണല്ലോ ശീലം...ഗായകൻ അല്ലേ..😎.
ക്ലാസ്സിലെ കുട്ടികളും....എന്തിനു കോളേജ് മുഴുവൻ എന്റെ പാട്ടു കേൾക്കാൻ വേണ്ടി കാത്തിരിക്കുന്നു...സുഹൃത്തു ഹരി...അവനു കാലിൽ എന്തോ പരിക്ക് പറ്റി നടക്കാൻ പോലും വയ്യാതെ എന്റെ പാട്ടു കേൾക്കാൻ വേണ്ടി മാത്രം വന്നു ഗാലറിയിൽ ഇടം പിടിച്ചു....നല്ല തിരക്ക്..എന്റെ പേര് മൈക്കിലൂടെ പറഞ്ഞതും കൈയ്യടി തുടങ്ങി....കർട്ടൻ മെല്ലെ മുകളിലേക്ക് ഉയർന്നു....എന്നെ കണ്ടതോടെ കൈയ്യടിയുടെ ശബ്ദം കൂടി വന്നു....ആ ഒരു സെലിബ്രിറ്റി ഫീൽ ഉണ്ടല്ലോ.....അതൊക്കെ അനുഭവിക്കണം...❤️
കരോക്കെ ഇട്ടു....ഞാൻ പാടിത്തുടങ്ങി....
"ഒരു മാലൈ ഇളവെയിൽ നേരം..
അഴകാന ഇളയുതിർ കാലം..."
ഇത്രേം പാടിയതേ എനിക്ക് ഓർമ്മയുള്ളൂ....😬കോളേജ് മൊത്തം കൂകി വിളിച്ചു.... പാടിയപ്പോൾ വെള്ളി വീണതാണോ സ്വർണ്ണം വീണതാണോ എന്നൊന്നും ഒരു പിടിയുമില്ല...ശബ്ദം ആകെ ഇടറി...ആദ്യ രണ്ടു വരി കേട്ടപ്പോ തന്നെ സുഹൃത്തു ജോൺസൻ മതിൽ വഴി എടുത്ത് ചാടി രക്ഷപെട്ടു.🏃♂️ സുഹൃത്തു റിയാസ് അവനെന്തോ ഫോൺ വന്ന പോലെ ഫോണും ചെവിയിൽ പിടിച്ചു ഒറ്റ ഓട്ടം...🕺🤳. നടക്കാൻ വയ്യാത്ത ഹരി മാത്രം ആൾകൂട്ടത്തിൽ നിന്നു കൊണ്ട് എന്നെ രൂക്ഷമായി നോക്കുന്നുണ്ടായിരുന്നു....🙆♂️ കർട്ടൻ പൊക്കിയവൻ എന്നെ പുച്ഛത്തോടെ നോക്കികൊണ്ട് കർട്ടൻ ഇട്ടോട്ടെ എന്ന മുഖഭാവത്തിൽ ആക്കി ചിരിക്കുന്നു...🙏
എന്നാലും ചില കട്ട ഫാൻസ് കൈയടിച്ചു.... ഞാനും വിട്ടു കൊടുത്തില്ല...രണ്ടു വരി അല്ലേ ആയുള്ളൂ...മൂന്നാമത്തെ വരിയിൽ പോയ മാനം തിരിച്ചു പിടിക്കാം...💪. ഇപ്പ ശരിയാക്കിത്തരാം എന്ന മട്ടിൽ വീണ്ടും പാടി....അതേ ഇടറിയ ശബ്ദം...ഇത്തവണ കൂവലിന്റെ ശക്തി കൂടി കൂടി വന്നു...പാടി മുഴുമിപ്പിക്കാൻ അവർ സമ്മതിച്ചില്ല...ദേഹത്തു മണ്ണ് പറ്റും എന്ന അവസ്ഥ വന്നതോടെ കർട്ടൻ താഴ്ത്തേണ്ടി വന്നു....സ്റ്റേജിൽ നിന്നും ഇറങ്ങിയപ്പോ ഹരി എന്നോട് ചോദിച്ചു..."ഡാ...നിനക്കെന്ത് പറ്റി...? " ഞാൻ പറഞ്ഞു "കൂൾ ഡ്രിങ്ക്ഡ് കുടിച്ചതിന്റെ ആകാം...ശബ്ദം ഇടറി..." ഇത് കേട്ടു മറ്റുള്ള കൂട്ടുകാരും ഓടി വന്നു...."പ്ഫാാ....പാടാൻ കേറുമ്പോളാണോടാ തണുത്ത വെള്ളം കുടിക്കുന്നത്" എന്നൊരു ആട്ടലിൽ തുടങ്ങി സന്തോഷ് ജോർജ് കുളങ്ങര പറയുന്ന പോലെ അവർ എന്തൊക്കെയോ ഗോത്രഭാഷയിൽ എന്നോട് സംസാരിച്ചു....🙉
ഒരു ഗായകന്റെ ഉയർച്ചയും പതനവും ഒരേ വേദിയിൽ...അന്നെന്റെ പാട്ട് കേട്ടവർ ആരും പിന്നീടൊരിക്കലും അതിന്റെ ഒറിജിനൽ കേൾക്കാൻ വഴിയില്ല...അത്രക്ക് ഗംഭീരപ്രകടനം ആയിരുന്നു ഞാൻ കാഴ്ച വച്ചത് 🙈. എന്തിനു...ഞാൻ പോലും ആ പാട്ടു വെറുത്തു പോയി...15 വർഷങ്ങൾക്ക് ശേഷം ഈ കുറിപ്പെഴുതാൻ വേണ്ടി ഇന്നലെ ഞാൻ ആ പാട്ടു വീണ്ടും കേട്ടു...എനിക്ക് തന്നെ ചിരി വന്നു...എന്തൊക്കെ ആയിരുന്നു...😐
എന്നെ സംഗീതം പഠിക്കാൻ വിടാത്തത് കൊണ്ട് അമ്മയോട് എപ്പോളും ഞാൻ പരാതി പറയുമായിരുന്നു....അച്ഛനോട് പറഞ്ഞാൽ പറയും "മോനേ...ഇവിടെ 5 പശുക്കൾ ഉണ്ട്...നീ വെറുതെ പാടി അതുങ്ങളെ വെറുപ്പിക്കരുത്" 🙄
എന്തായാലും റാഗിങ് കാരണം ഉള്ളിലെ പാട്ടുകാരൻ പുറത്തു വന്നു....പിന്നെയും ഒരുപാട് വേദികളിൽ "വിനീതനായി" പാടി...കൈയ്യടി കിട്ടി... ഇപ്പോൾ പാടാറില്ല....അവസരം ഇല്ല...പിന്നെ smule...അതൊന്നും ഒരു രസമില്ലന്നേ....സ്റ്റേജിൽ കേറി പാടുന്ന സുഖം ഒന്നു വേറെ തന്നെയാ...🎤🎶. അതിപ്പോ കൈയടി ആയാലും കൂവൽ ആയാലും രണ്ടു കയ്യും നീട്ടി സ്വീകരിക്കുക.. നിർത്തുന്നു...💕💕💕
സന്ദേശം : വിനയാന്വിതനായിരിക്കുക... വിജയങ്ങളിൽ അഹങ്കരിക്കാതിരിക്കുക...!!
Be Humble...Don’t Let Success Go to Your Head...!!
